Прэзідэнт Беларусі Аляксандр Лукашэнка 24 снежня 2020 года падпісаў распараджэнне аб заахвочванні таленавітых маладых навукоўцаў. Стыпендыі Прэзідэнта прызначаныя 97 маладым навукоўцам, у тым ліку 12 дактарам навук да 45 гадоў, 56 кандыдатам навук да 35 год і 29 навукоўцам без ступені да 30 год.
Марыя Юркевіч, кандыдат біялагічных навук, дацэнт кафедры імуналогіі факультэта экалагічнай медыцыны МДЭІ ім. А. Д. Сахарава БДУ – увайшла ў лік лепшых дзесяці маладых навукоўцаў Беларускага дзяржаўнага ўніверсітэта, удастоеных стыпендый Прэзідэнта Рэспублікі Беларусь на 2021 год.
Даследчыца атрымала стыпендыю за комплекснае даследаванне ішэмічна-рэперфузійнага пашкоджання нырак на эксперыментальнай мадэлі (у лабараторных жывёл), распрацоўку і абгрунтаванне на яго аснове новага спосабу клеткавай тэрапіі вострай нырачнай недастатковасці, прымяненне якога ў клінічнай практыцы дазваляе аднавіць экскрэторную функцыю нырак без працяглага прымянення дарагіх метадаў пазаныркавага ачышчэння крыві.