Юбілейная XV Міжнародная навуковая канферэнцыя маладых вучоных, студэнтаў, магістрантаў і аспірантаў «Actual environmental problems» прайшла ў МДЭІ імя А.Д.Сахарава БДУ з 27 па 28 лістапада. Мерапрыемства ў вочна-дыстанцыйным фармаце аб’яднала каля 360 даследчыкаў з Беларусі, Расіі, Кітая, Узбекістана, Туркменістана і Таджыкістана.
Урачыстае адкрыццё адбылося 27 лістапада на Даўгабродскай, 23/1 з удзелам начальніка аддзела міжнароднага супрацоўніцтва Міністэрства прыродных рэсурсаў і аховы навакольнага асяроддзя Рэспублікі Беларусь Ларысы Лукінай.
«Як маладыя навукоўцы, вы валодаеце свежымі поглядамі і смелымі ідэямі, якія могуць прывесці да рэвалюцыйных змен у галіне аховы навакольнага асяроддзя. Вашы даследаванні, абмеркаванні і знаходкі – гэта не проста ўклад у навуку, але і практычныя крокі па паляпшэнні якасці жыцця на планеце», – адзначыла Ларыса Сяргееўна ў прывітальным слове.
У рамках пленарнага пасяджэння, якое адкрыла канферэнцыю, былі заслуханы даклады пра сучасныя выклікі ў экалогіі і здароўі. Сярод іх – аналіз сістэмы экаманіторынгу, трэнды ў галіне экалагічнай упакоўкі, роля мікрабіёма і прафілактыка неінфекцыйных захворванняў.
Далей форум працягнуўся на тэматычных секцыях:
- Сацыяльна-экалагічныя і этыка-педагагічныя праблемы сучаснасці.
- Медыцынская экалогія.
- Праблемы сучаснай экалагічнай бяспекі (біяманіторынг, біяіндыкацыя, біярэабілітацыя, радыеэкалогія і радыяцыйная бяспека, экалагічны маніторынг, менеджмент і аўдыт. Інфармацыйныя сістэмы і тэхналогіі ў экалогіі).
- Біяінфарматыка.
Маладымі даследчыкамі былі прадстаўлены актуальныя вынікі даследаванняў, прысвечаных розным аспектам ужывання штучнага інтэлекту. У прыватнасці, былі разгледжаны магчымасці выкарыстання штучнага інтэлекту для аднаўлення водных рэсурсаў, маніторынгу радыеактыўнага забруджвання, выкліканага аварыяй на Чарнобыльскай АЭС, аналізу ўзаемасувязі кліматычных змяненняў і біяразнастайнасці горных ледніковых экасістэм, а таксама вывучэння ўплыву адходаў вытворчасці фосфарных угнаенняў на стан глеб.
Па выніках канферэнцыі падрыхтуюць зборнік навуковых матэрыялаў, які апублікуюць у Электроннай бібліятэцы БДУ.
