МДЭІ імя А.Д.Сахарава БДУ прымае місію МАГАТЭ па ацэнцы навучання і падрыхтоўкі кадраў EduTA. Місія ставіць сваёй асноўнай мэтай ацаніць на комплекснай аснове дзеючую інфраструктуру і механізмы падрыхтоўкі спецыялістаў у галіне радыяцыйнай абароны і бяспекі, а таксама прааналізаваць прымяняемыя падыходы і існуючыя магчымасці.
У складзе дэлегацыі – міжнародныя эксперты і супрацоўнікі МАГАТЭ на чале з Жэняй Васільевай (Балгарыя). Таксама ў складзе групы каардынатар місіі Андрэа Лючыяні (МАГАТЭ), эксперты Аляксандр Вадаватаў (Расія) і Сатырыс Эканомідэс (Грэцыя).
Галоўнай тэмай абмеркавання падчас візіту 11 лістапада стала пытанне пра магчымасць правядзення МДЭІ імя А.Д.Сахарава БДУ міжнародных паслявузаўскіх курсаў па радыяцыйнай абароне і бяспецы. Выкладчыкі кафедры ядзерных і медыцынскіх тэхналогій пазнаёмілі сяброў камісіі з гісторыяй і мэтамі кафедры, а таксама правялі экскурсію па навучальных лабараторыях. Прадстаўнікамі дэлегацыі было адзначана, што абсталяванне, якое выкарыстоўваецца для навучання спецыялістаў у сферы ядзерных тэхналогій, цалкам адпавядае сучасным патрабаванням і дапамагае студэнтам падрыхтавацца да рэальнай працы ў атамнай энергетыцы.
Па выніках візіту місіі прадугледжваецца дасягненне наступных вынікаў: удасканаленне нацыянальнай прававой і нарматыўнай базы, гарманізацыя сістэмы навучання са стандартамі бяспекі МАГАТЭ, а таксама адаптацыя методык прафесійнай падрыхтоўкі з улікам нацыянальных патрэбнасцей і задач па павышэнні ўзроўню кампетэнтнасці персаналу.
Пасля сумеснага разгляду і зацвярджэння беларускім бокам будзе падрыхтаваны падагульняючы дакумент. У ім будуць прадстаўлены рэкамендацыі і дэталёвы план дзеянняў, які ўключае тэрміновыя крокі для паляпшэння бягучай абстаноўкі і доўгатэрміновыя прапановы па нарошчванні патэнцыялу ў галіне навучання і прафесійнага развіцця.
Удзел у місіі EduTA дазволіць інстытуту атрымаць каштоўныя рэкамендацыі для ўдасканалення адукацыйнага працэсу ў сферы ядзерных тэхналогій.
