Студэнтка МДЭІ імя А.Д.Сахарава БДУ стала пераможцай у намінацыі «Студэнт года-ONLINE» на ўніверсітэцкім этапе рэспубліканскага конкурсу «Студэнт года – 2025». Мерапрыемства накіравана на развіццё лідарскіх якасцей, раскрыццё творчага патэнцыялу моладзі, стварэнне ўмоў для яе самарэалізацыі, а таксама на развіццё студэнцкай ініцыятывы і павышэнне прэстыжу ведаў.
Падвядзенне вынікаў універсітэцкага этапу адбылося 4 лістапада ў актавай зале факультэта журналістыкі.
У фінале канкурсанты прадэманстравалі творчыя нумары, яркія самапрэзентацыі, а таксама відэа аб сваіх поспехах у вучобе, навуцы, грамадскім жыцці, культуры і спорце. Па выніках інтэрнэт-галасавання, набраўшы больш за 10 000 галасоў, у намінацыі «Студэнт года-ONLINE» перамагла студэнтка 2 курса факультэта экалагічнай медыцыны Дарына Тарасенка.
Віншуем Дарыну з заслужанай узнагародай і жадаем далейшых поспехаў у вучобе, навуковай і грамадскай дзейнасці!
